Motor Drive PCB එකක් හදමු

Posted on October 12, 2016 · 5 mins read · Sinhala

Cover Image

කලින් ලිපියේ පොරොන්දු වුණා වගේම මම අද කියාදෙනවා Motor Drive Module එකක් ගෙදරදිම හදාගන්න විදිහ.

ඒකට මේ ලැයිස්තුවේ තියෙන දේවල් ඕන වෙනවා.

  • L298 IC
  • 7805
  • 1N4001 Diodes x 8
  • වෙරෝ බ‍ෝඩ් එකක්
  • 2 pin Terminal Block x 3
  • Male header (Pin තුනේ කෑලි 4ක්)
  • පරිපථ වයර්
  • ඊයම් + බවුත් එකක්

දැන් වෙරෝ බෝඩ් එක අතට ඇරන් යට පැත්ත හරවලා බලන්න. දැන් ඔයාලට පේනවා ඇති සිදුරු අතරින් තඹ තීරු තියෙනවා කියලා. මේවා දිගේ විදුලිය ගමන් කරන නිසා මේ තීරුවක තැන් 2 ක උපකරණ දෙකක් වෙන වෙනම පාස්සලා ඒ දෙක එකිනෙක සම්බන්ධ කරන්න පුළුවන්. මේ නිසා පරිපථය පුරාම වයර් ගොඩක් අමුණගෙන කරදර වෙන්න ඕන නෑ.

මෝටර් ධාවක පරිපථය හදමු

දැන් L298 IC එක අතට ගන්න. මේක සාමාන්‍යය IC එකකට වඩා ටිකක් වෙනස්. මේක වෙරෝ බෝඩ් එකට සම්බන්ධ කරන්න නම්, pin 8 ක් තියෙන පේලියේ pin ටික පොඩ්ඩක් විතර පැත්තකට නමාගන්න වෙනවා. ඒක කරන්නේ කොහොමද කියලා මේ රූපසටහන් වලින් බලාගන්න. (උඩින් බැලුවම මේ විදිහට තියෙන්න ඕන.)

Setup the IC

දැන් මේ රූපසටහන්වල තියෙන විදිහට උපාංග ටිකයි, වයර් ටිකයි පාස්සගන්න.

Soldering Guide 1

බවුත් එකෙන් නිවැරදිව පාස්සන හැටි ඉගෙනගන්න කැමති නම් මේ Video ටික බලලා ඉන්න.

Blog Post : නිවැරදිව පාස්සන්න ඉගෙනගනිමු

පළවෙනි රූපයේ තියෙන්නේ උපාංග සම්බන්ධ කලාම උඩින් පේන විදිහ. මේක බලාගෙන උඩින් සියළුම උපාංග සම්බන්ධ කරලා සුපර් ග්ලූ වලින් හරි වෙනත් ක්‍රමයකින් හරි සියළුම කොටස් පරිපථයට සම්බන්ධ කරගත්තා නම්, පාස්සන වැඩේ ගොඩක් ලේසි වෙයි.

Soldering Guide 2

දෙවෙනි රූපයෙන් සම්පූර්ණ පරිපථයම පෙන්වනවා.

වැදගත් කරුණු

රතු පාට කඩඉරි වලින් සදහන් කරලා තියෙන තැන්වලින් වෙරෝ බෝඩ් එකේ තඹ තීරුව විසන්ධි කරන්න. (යකඩ අඩිරූලකින් හූරලා තඹ තීරුව ල‍ේසියෙන්ම විසන්ධි කරන්න පුලුවන්)

කොල පාටින් පෙන්නලා තියෙන Terminal Blocks කෙලින්ම වෙරෝ බෝඩ් එකට සම්බන්ධ කරන්න ටිකක් අමාරුයි. ඒකට වොරෝ බෝඩ් එකේ සිදුර ටිකක් විතර ලොකු කරගන්න වෙනවා.

අළුපාටින් පෙන්නලා තියෙන තැන්වලට Pin Headers සම්බන්ධ කරගන්න.

7805 පාවිච්චි කරලා තියෙන්නේ IC එකට +5v වෝල්ටීයතාවක් ලබාගන්නයි. මේක On Board Regulator එකක් විදිහටයි ක්‍රියාත්මක වෙන්නේ. රොබෝ හැදුවට පස්සේ රොබෝගේ පරිපථ වලට අවශ්‍යය 5v ලබාගන්නත් මේ Regulator එක භාවිතා කරන්න පුළුවන්.

7805 Pinout

LED එකක් (රතු පාටින් තියෙන්නේ LED එක) දාලා තියෙන්නේ Module එකට විදුලිය ලැබෙනවාද කියලා දැනගන්න පහසු වෙන්නයි. කැමති නම් මේ විදිහටම IC එකේ EnA, EnB අග්‍ර වලටත් LED එක බැගින් සම්බන්ධ කරගන්න. එතකොට මෝටර් 2 වැඩ කරනවද නැද්ද කියලා ලේසියෙන්ම බලාගන්න පුළුවන්. (මතක ඇතිව 470 ohm ප්‍රතිරෝධකයක් පාවිච්චි කරන්න. නැත්නම් LED එක පිච්චෙන්න ඉඩ තියෙනවා)

අග්‍ර හදුනාගනිමු

GND වලට බැටරියේ සෘණ අග්‍රය සම්බන්ධ කරන්න.

+V වලට 6v ඉදලා 12v වෙනකම් ඕනෑම වොල්ටීයතාවක් දෙන්න පුලුවන්.

+5V Output අග්‍රවලින් 5V වොල්ටීයතාවක් ගන්න පුළුවන්. මේ අග්‍ර ටික ඉස්සරහට ගොඩක් ප්‍රයෝජනවත් වෙයි.

අනිත් අග්‍ර ටික ආර්ඩියුනෝ බෝඩ් එකට සම්බන්ධ කරලා program එකක් ලියන්නේ කොහොමද කියන එක මම ඊළග ලිපියෙන් කියාදෙන්නම්.

මේ තියෙන්නේ මම අවුරුදු කීපයකට කලින් හදාගත්ත Motor Drive PCB එකක්. අවාසනාවට දැන් මගේ ලග මේකේ Circuit Diagram එකයි PCB layout එකයි හොයාගන්න බැරිවුණා.

My L298 Driver 1

My L298 Driver 2